بسم الله الرحمن الرحيم
انا وصاحبي متعب قررنا ماهو آت > اسلم يابو متعب :$ ..
بنوقف نشر هنا في سعودي تمبلر، وكذلك بنوقف استقبال الاسئلة.. :(
سعودي تمبلر ارشيف متوفر لكم بالتأكيد، وفيه نسخة احتياطية في حال لا سمح الله حدث أي طاريء. للحساب هذا.
نعتذر بكل أسف من اللي تقدموا بأسئلتهم لنا في هالفترة.. والله كان بودنا نخدمكم ونساعدكم ولكن اسفين .. :(
ونعتذر كذلك بكل أسف بجد من كل اللي تأملوا فينا وتابعونا خلال هالكم يوم.. المتابعين الجدد بصراحة رقمكم يروّع ماشاء الله اكثر من 900 !! :(
سعودي تمبلر.. كانت في البداية مجرد بداية لدعم عربي لمدونّي تمبلر.. دعم فني حقيقي زي مانفهمه انا ومتعب.. وهو حل مشكلاتك كمدوّن بأسهل طريقة .. بشكل سلس .. بكلامنا، بلهجتنا السعودية المحلية البسيطة.. حبينا نوفر حلول لمشكلاتكم واجتهدنا بتقديم الافضل والاسهل والاحدث لكم.. من غير تكلف وبدون فلسفة.
مشكلة الدعم الفني العربي- برأينا وعلى العموم ومانخّص احد بعينه - انه يحس روحه جاي من عطارد او زحل.. كائن فضائي ذكي وعبقري والباقين مجرد “هطوف” واغبياء .. انا اسف ولكن للأسف هذا الواقع اللي خابرينه زين.. وحاولنا قد مانقدر في سعودي تمبلر نقدم دعم فني غير.. بشكل غير.. وهذا كان سبب اجتمعنا عليه انا ومتعب واتفقنا على ان تمبلر مو متوفر له الدعم العربي الكافي والمقنع. فحاولنا وكانت رحلة سعودي تمبلر زي ماتابعتوا وشفتوا.. والحكم بالنهاية لكم مو لأي واحد فينا.
مانزعم العلم ولا ندعيه.. مافيه ادّج منا بصراحة..!! تصدقون لو قلنا لكم انه كثير من الاسئلة اللي جاوبنا عليها..بحثنا في قوقل الى ماحصلنا اجوبتها المناسبة .. وبعد مالقينا الاجوبة.. جينا وجربنا الاجابة والأكواد قبل مانقدمها لكم..
بجد كان مجهود جبّار ياجماعه ولا ابالغ… بس كانت اوقات حلوة.. وحلاوتها انكم سمحتوا لنا نساعدكم .. في الاساس شكراً لكم انتم ♥
كانت رحلتنا معكم رحلة مميزة.. نفتخر فيها اكيد وفيكم يا أحبة ♥
بنوقف الآن في هالفترة بعد مانشرنا كل اللي نبي ننشره.. ونعتقد انه مو كافي.. ولابد من بذل المزيد والمزيد من الجهد في تعريب الويب وشروحاته بشكل عام مو بس موقع التمبلر.
يارب اننا ساهمنا ولو 1% في زيادة معرفتكم واهتمامكم في موقع تمبلر..
يارب اننا ساعدنا ولو 1% في حل مشكلاتكم واسئلتكم واستشاراتكم..
في النهاية.. ما اقول الا..
فمان الكريم يالغالين.. ولاتنسونا من صالح دعائكم.. ♥
عباس & متعب
